Магӏалбике дӏабихьар 2004 шера хатара юкъе бейнарех бола дагалоаттам
Гӏалгӏайчен Магӏалбике хилар, хӏара шера дӏахьош йола, Сийлахь-боккха Даьймехка тӏом лаьтта 85 шу хилара, 2004 шера шоай балха декхараш кхоачашдеш бейнача, бокъонаш лораеча болхлойх болча дагалоаттама хетаяь кхетаче.
Турпалхойх дагалоаттам хилар Тӏема Сийлен шахьаре, цар цӏераш цӏаккха а йовргйоацаш язъяьй Гӏалгӏайчен, берригача мехка исторен оагӏонаш тӏа. Ше моаршал хоатташ, Гӏалгӏай Республикан кулгалхочо Келаматанаькъан Махьмуд-ӏаьлас белгалдир, вай мехкахой, къаьстта Даьхе лораеш латтараш, наха лоархӏаш хилар.
«Вай сий ду котало яьккхача ноахала. Аьтинга бетта 22 гӏа ди – Сийлахь Боккха тӏом болабаь ди да, цо дӏадихьар миллионаш болча наьха вахар. Кавказ йоаккхаш лаьттача тӏема керттера моттиг хилар Магӏалбик, советский салташа, региона бахархоша цига моастагӏа юхатехар шоай мел бола низ, денал ураоттадаь. Цар иштта дакъа цу юкъедарах «тӏема сийлен шахьар» аьнна цӏи елар цун», - аьлар региона Кулгалхочо.
«Вайна дагаух, тӏем тӏа баха воай мехкахой. Царна карагӏдаьннар юкъарча Коталон цхьа дакъа да, вай декхарийла да из тӏехьа тӏадоагӏача ноахалга кхачийта», - аьлар Макшарипа Махьмуд-Ӏаьлас.
Мехка Кулгалхочо яхачох, цу юкъе къаьстта ӏаткъар 2004 шера аьтинга бетта 22-ча бус хиннар, цу хатара юкъе хьалхара хало шоашта тӏаийцараш ба бокъонаш лораеча моттигий болхлой. Цар кхоачашдир шоай декхар, шоай вахар дӏаделар мохк лорабеш.
«Тахан вай иштта баркал оал, лаьрххӏача тӏема операце доакъашхошта. Вай бӏухоша сий долаш кхоачашду шоай декхар, цар денал, майрал гойт тӏема мугӏарашка. Цар тӏема декхар – Даьхе лораяра ӏадат дӏахо дӏадахьар. Из царга кхаьчад вай даьшкара. Вай доаккхал ду царех, уж хьаллоац массайолча оагӏорахьара. Вайна дагабоагӏа фусамашка бала кхаьча хӏара дезал.
Бейнарий дагалоаттам – из вай исторена хьалхашкара бехктокхам ба. Дӏаяхача ханашка санна, тахан а керттера да ший мохк, ший къам лорадар.
Сий долаш бахалба Сийлахь-боккхача тӏема турпалхой», – йоах хоамо.
Сий долаш хилба шоай балха декхар кхоачашдеш байна болхлой! Даим сий долаш хилда Даьхе лораеш латта ноахал!
