МагӀалбике Кхалнаьха денца даькъалабийцар, СВО бӀухой ноанойи фусам-ноанойи
Шоай Даьхе бахьан долаш бейна ЛаьрххӀача тӀема операце бӀухой дезалаш хьаллаца лаьрхӀа болам дӀабихьар МагӀалбике. СВО бӀухой ноаной, фусам-ноаной бийхар шахьара администраце, Халкъашта юкъерча кхалнаьха цӏайца - Тушола бетта 8-ча денца даькъалабувца дагахьа.
«Болам дӀахьош, бейнача Даьхен бӀухой дезалашта кхачан даараш делар. Шахьара администраце кулгалхочун гӀончас Садакъанаькъан М. къамаьл дир кхалнахаца, уж даькъалабувцаш ловца боаккхаш. Цо шахьара кулгалхочун Галай М. цӀерах уж хьаллоацаш дола дӀайха дешаш аьлар. Шахьара кулгалхочун гӏончас белгалдир, администраце бӀухой денал, цар цӀераш дагалоаттаяр керттера декхар лоархӀ», - аьлар «Сердало» газетага МагӀалбика кхален администраце зарбан болх лелабераша.
СВО бӀухой фусамий викалаша а шоай оагӀорахьара баркал аьлар, укх атта йоацача хана шоаш дагабохарах.
