Нах хӏама даа тӏалаттача моттигий хьал тохкаш хилар Магӏалбике
Бахархой хӏара денна хӏама даа чуухаш болча юкъарча моттигий хьал тахка арабаьлар Магӏалбике. Наьха кхерамзлен хьал лорадарца лоархӏаме моттиг дӏалоацаш гӏулакх да из. «Сердалога» из хоам бера шахьара администрацера.
Тхога дийцачох, из хьал малагӏча боараме латт хьожаш тохкам бе арабаьннараш бар Роспотребтӏахьожама, Россельхозтӏахьожама, йоалах йолча федеральни моттига, иштта Россе «Магӏалбик» яхача МВД оагӏон болхлой. Массехк тӏахьожама моттигерча къахьегамхоша, цхьана гулбенна, болх дӏабахьаро дикагӏа гучадоах моллагӏа кхоачамбоацараш. Эггара хьалхарча оагӏонца теркалдир, из гӏулакх дӏахьош йола моттиг бокъонца кийчо яь йий. Бизнесменаш йоалах болча оагӏонца дӏаязбаь латташ бий, цу чу болх беш бола нах къахьегама оагӏонца чӏоагӏо оттаяь, бокъоно дӏадеххача тайпара шоай хӏама тоадаь бий техкар цу дийнахьа.
Къаьстта терко йир дулхах даараш кийчдеча моттигашта. Из гӏулакх дӏахьочарга хьайбай лорашкара каьхат хила деза, дулх лертӏа долга тешал деш. «Бакъдолчун хьарак» яхача, хӏама телха, во доацилга белгалдеш болча паччахьалкхен оагӏонцара мухьар тӏалатташ хила беза кхача. Из деррига тохкаш хилар цу гӏулакха арабаьннараш.
Белгалде деза, царна цхьацца кхоачамбоацараш ходеннилга. Гӏалатло йолча бизнесменашта тӏадиллар, йоккха юкъ ялале, шоай болх ӏаьдала бокъоно дӏадеххача тайпара меттабоалабелга. Гучадаьннача кхоачамбоацарех дола каьхаташ прокуратурага дӏакхоачийтаргда, дӏахо цу гӏулакха къоастам бергболаш.
