Дажалаша Магӏалбикера моттиг йохайир
Магӏалбикерча мехкдаьтта болхлой cкверера бурчолгаш дохадир дажалаш а ванчӏараш а ала мегаргдолча гӏожача наха. Из хӏама хӏанз хьалхара нийслуш дац.
Зуламхоша кхыйола моттигаш телхаеш, уж тоаеш баьхкаб болхлой, дукха рузкъа дӏатӏаухийташ. «Шахьара администраци оарцагӏъяьнна, дохадаь бурчолгаш тоадаьд. Шахьара ганзерча ахчах дӏакхухьаш ба бахархошта салаӏа, паргӏатта ха яккха моттигаш хилийта гӏерташ беш бола болх. Тахан лакха тӏахьожам, терко лоаттае езаш гӏулакх да из. Царга шахьарера моттигаш телхаяйтар чакхдалийта йиш йолаш хӏама дац.
Бахархошта, къаьстта кагирхошта хьалхадаха деза из. Ишколашка, юкъарлен оагӏонашка гӏолла дӏабахьа безаш болх ба из», - дийцар «Сердалога» шахьара администраце.
Аллеяш, паркаш, сквераш тахан тоаеш я бахархошта, берашта, ха яхача наха салоӏаш, цӏенача феца садоахаш ха дӏакхахьа моттигаш хургйолаш.Шортта рузкъа ӏодуллаш хьабеш ба из болх, хӏаьта цу дерригнена хам беш боацаш, из толхадеш, наха новкъарле еш лелараш бехктокхаме оза беза. Хӏаране кхетаде деза, ӏокхесса гӏаьлен юхк, дохадаь гӏанд, яздаь пен, толхаяь кхыйла наха пайда эцаш йола моттигаш из леладечун юхь йоаеш хӏамаш долга. Зуламхо хила ца а гӏерташ, телхар тоадеш хила веза саг!
