Бокъо йоацача тайпара хӏама йохкарашца, болх дӏахьоргба Магӏалбике
Бокъо йоацача тайпара хӏама йохкарий балхах дувцаш, кхетаче дӏайихьар ше волча Магӏалбикерча администрацена кулгал деча Галай Мусас. Цига гулбенна хилар Роспотребтӏахьожама, йоал ийеча инспекце болхлой, шахьара администраце экономически оагӏонцара къахьегамхой, иштта кхыбараш а.
«Кхетаче къаьстта терко тӏайохийташ дийцар наькъа оагӏонашца хӏама йохкаш латтарий балхах. Цу гӏулакхо новкъарле ю машинашта, бахархошта. Кхетаче белгалдир, кхаьч-кхаьча ӏоувтташ базар е йиш йоацилга. белгалдеш дола улгаш хьалтоха деза, аьнна, иштта каст-каста рейдаш дӏакхахьа еза, шахьаре из хӏама цадаржийтара тӏехьа. Цул совгӏа, хӏама йохкаш латтарашка, из йохка бокъо луш дола каьхат дий хьожаш а терко е еза», - аьлар тхога шахьара администраце.
Дагадеххача дӏаувтташ хӏама йохкар цу оагӏонцара бокъо йохаеш, хоададаь дӏадаккха дезаш во гӏулакх да. Тахан бахархоша кхетаде деза, наькъа оагӏонашца бохкаш латтача кхача хьал дика лерхӏаш хила йиш йоацилга, цул совгӏа, шахьара хьурмата зе деш а да из гӏулакх.
