Магӏалбике къонача бахархошта хьалхара паспорташ дӏаделар
Магӏалбик-Шахьара администраце кхетачений зале лаьрххӏа дола вӏашагӏкхетар хилар. 15 дешархочоа шоай керттера каьхат дӏаделар - Россе вахархочун паспорт.
Из кхетаче дӏайихьар «Вай Россе дахархой да!» яхача лостамагӏа, из вӏашагӏъеллар яр моттигера «Хьалхарчар Болам» яха отделени. Паспорташ дӏалуш хилар шахьара администраце кулгалхо Боканаькъан Мухьмад. Кагирхошца къамаьл деш, цо аьлар, паспорт - из духхьал каьхат хинна ӏац, хургдолча вахара новкъа бехктокхаме гӏа баккха бокъо луш да из.
«Боканаькъан Мухьмадаца къамаьл дӏайха а хьехам беш а хилар. Бераша дийцар шахьара кулгалхочунца лоархӏаме дешаш: граждански декхар, Даьхенцара безам, воккха хилча тӏаэцаш бола бехктокхам. Къаьстта белгалдир ший мехка накъавоалаш, эшача дакъа лоацаш, культуран мах бараш лорадеш хила везилга», - аьлар «Сердало» газетага шахьара администраце зарбан болх лелабераша.
«Вай Россе дахархой да!» яха проект лаьрхӏа я, паспорт хьаэцаш йола хьалхара ха цӏайна кеп йолаш дӏаяхьара, кхувш йоагӏача тӏехьенна из йицлургйоацаш. Магӏалбика къонача бахархошта из ди лерхӏаме хилар.
