Магӏалбикерча № 18 йолча ишколе, экстремизмаца къовсам лоаттабар дийцар
Кхерамзлен хьал лорадарах йола лоархӏаме кхетаче дӏахьош хилар, Магӏалбикерча № 18 йолча ишколе. Терроризм, экстремизм яха бӏеха зулам дохадара, цунна духьале лоаттаяра тӏехьара кхетаче яр из. Къонабарашца иштта бола болх дӏакхахьар тахан чӏоагӏа лоархӏаме да.
«Кхетаче бар мехкарча МВД терроризма духьале лоаттаеча оагӏон болхлой, 18 шерга кхачанза барий гӏулакхех бола викалаш. Дешархошка цар дийцар цу бӏехача, доккхача зуламах хьокхавеннар ший ираз доадаь саг волга, цхьаккха зулам бекхам боацаш, кхел йоацаш дусаргдоацилга.
Иштта царна хьалхадаьккхар, интернета оагӏонашка гӏолла цу зулама юкъе хӏетта кхийнараш чубига гӏертарашка ладувгӏа, царца цхьаккха тайпара бувзаме вала, ше тувлавайта йиш йоацилга. Моллагӏа тешаме ца хета хӏама зийначо ӏалаьмате чехка хоам бе беза ӏаьдалга», - дийцар «Сердалога» Магӏалбика кхален администраце зарбан болх лелабераша.
Иштта йола кхетаченаш дӏакхахьар тахан чӏоагӏа лоархӏаме да мехка. Кхувш латтача къонабарий кхетам нийсбеш, воча хӏаман юкъегӏоргбоацаш уж лорабара тӏехьа къахьегаш, фийла долаш хила деза вай.
