Магӏалбикерча № 18 йолча ишколе Кхоартой Исмаӏала сийна «Турпала парта» оттайир
Кхоартой ӏалаудина Исмаӏала цӏера хетаяь «Турпала парта» хьайийллар Магӏалбикерча № 18 йолча ишколе. Россе тӏема операцена юкъе дакъа лоацаш, ший декхараш дизза кхоачашдеш лаьттав вай мехкахо. Из кхетаче дӏахьош хиннараш бар Ерригача Россе «Къона эскар» яхача оагӏон доакъашхой, Къаман Фронт. Цига гулбелар бӏухочун цӏагӏара нах, хьехархой, дешархой, иштта кхыбараш а.
«2024-ча шера цунца хинна кхетаче дагайоагӏа тхона. Тӏема операце моттигашка декхараш кхоачашдеш латтача къонгех дийцар цо тхога. Цун бӏаргашка хоалора къонгех саготдеча даь гӏайгӏа, сагото. Цул тӏехьагӏа ше лаьрхӏар цо цига ваха. Тӏема декхараш кхоачашдеш, вахар хаьдар гварде сержанта, гранатомётчика гӏо деш вола иччархо волаш лаьттача цунна. Цун цӏи хӏанз массахана тха ишколаца бувзам болаш я. Деналах, майралах бизза хиннача къонгий цӏераш йицъе бокъо яц вай», - дийцар «Сердалога» Къаман Фронто.
«Турпала парта» яхар бӏарчча дешархой прокт я, царна Даьхе лораеш лаьттарий тӏема никъ бовзийташ йола. Парта тӏа Исмаӏала сурт латт, цун тӏема наькъах лаьца яздаьд.
Эггара хьалха цу Парта тӏа ӏоха бокъо яр эггара дикагӏа дешашвар ва. Яхь йолаш, денал долаш шоай декхараш кхоачашдеш хиннача къонгий вахара, къахьегама никъ бовзар лоархӏаме да къонача тӏехьенна.
