Магӏалбикерча №2 йолча ишколе СВО турпалхошца денала урок дӏайихьар
Гӏалгӏайчен Халкъа фронто Магӏалбика №2 йолча юкъерча ишкола дешархошца Денала урок дӏайихьар, цига дакъа лоацаш бар СВО бӏухой. Цун керттера бахьан дар шоайла къамаьл хилар, дешархошта Даьхе лораеш латтарий декхараш довзийтар.
«Кхетаче дӏахьош иштта дакъа лоацаш хилар «Даьхен лорабой» ганза моттигерча филиала викалаш, иштта Росгварде урхаллен болхлой. Бӏухоша берашта дийцар тӏема мугӏарашка латтача бӏухой декхарех, шоайла цар леладеча вошалах. Дешархоша хьаьшашка дукха хаттараш делар. Царна дезар деррига тӏема хьал довзар, цун эггара халагӏа йола моттигаш малагӏаш я хар, цу хьалашка бӏухоша шоай декхараш мишта кхоачашду шоашта дувцар», - аьлар «Сердало» газетага президента болама хьинардараша.
Росгварде викалаша, «Даьхен лорабой» ганза болхлоша белгалдир цу тайпара кхетаче дӏаяхьар лоархӏаме хилар.
Къамаьл чакхдоалаш, дешархоша баркал аьлар беза хьаьший шоаш болча баьхка хиларах, дег чура къамаьл хиларах.
