Магӏалбика кхале дийцар дегӏаахара керттера хаттараш
Гӏалгӏайчен Магӏалбика доал деча даькъ тӏарча администраце аргӏанара кхетаче хилар. Дувца оттадаь дош дар доал дара даькъ тӏара вахара хьал тоадар, дегӏадоаладар. Цига дакъа лоацаш хилар уж хаттараш чудоагӏача боахамий кулгалхой, республикан гӏишлошъяра Министерствон, капитальни гӏишлошъяра Урхаллен викалаш, иштта Гӏалгӏай Республикан хин боахама Цаӏ вола оператора» ГУПа говзанчаш.
«Дийца керттера дош дар кхален юрташка хица ӏалашо яр. Белгалдир, хин турбаш тишъенна хилара хаттар керте латташ хилар. Цунца дувзаденна хьал тоадара бола болх вӏашагӏболлаш ба массайолча оагӏорахьара. Уж балхаш кердадоахаш, лаьрхӏад тишъенна турбаш хувца, ӏоухаш дола хий доадергдоацаш из болх аттача баккха. Керттера терко тӏаяхийтар дӏахьош болча балха дикал лакха хилийтара, уж шоай ханнахьа хьадаь дахара», - аьлар «Сердало» газетага Магӏалбика кхален администраце зарбан болх лелабераша.
Кхетаче къаьстта долча хаттарий оагӏув яр, кхоачамбоацараш гучадахара йоагӏаш. Доакъашхоша белгалдир, каьхаташ тӏа бола хоам цу моттиге бокъонца долаш долча хьалаца нийслуш хила безилга. Моттигашкара хьал дувцача хана, акташ нийсъяра болх лерттӏа вӏашагӏбелла хила беза - из ца хилча даргдоацар да, дӏахьош бола болх мел ба хара, цунга дӏадодаш дар нийса дӏахьожадара.
Иштта цига дийцар «Шахьара дика хьалаш хьакхолларах» йолча федеральни проекта чудоагӏаш дола кхадж тассара хаттараш. Кхален кулгалхочо белгалдир, юртхой хьинарах тийша да уж бахача моттига куц-сибат хувцар, доазонаш тоадар. Цунца дувзаденна, из хаттар чудоагӏаш йолча моттигий кулгалхошта, юрташкарча администрацей кулгалхошта хьалхашка декхар оттадир, хӏара сагага дӏакхачийта, юрта долаш долча хьалашка хьежжа юкъара доазонаш кердадаха дезилга.
