Магӏалбика кхале доал деча даькъ тӏара хьал дийцар
Магӏалбика кхале аргӏанара кхетаче дӏайихьар, юрташкарча администрацей кулгалхошца. Кхетаче дийца дешаш дар вахара-экономически доазонаш дегӏадоаладар, урхаллен хаттараш сиха кхоачашдар.
«Кертерча хаттарех цаӏ дар, хӏанз кагирхой эскаре тӏахьехаш йола ха дӏайолалуш хилар. Доакъашхоша хоадам болаш къоастадир, эскаре амал де баха безача кагийча нахага хоам беш бола болх дӏабахьа безаш хилар, уж лорашка чакхбахарах дола дош.
Белгалдир, эскаре тӏахьехарах бола болх дика чакхбаккхара, шоайла айхха бувзам болаш хила езилга юрта администрацеш, тӏема комиссариат, бокъонаш лораераш. Юртий администрацей кулгалхошта тӏадиллар хоамий-тохкама болх моттигашка чӏоагӏбар», - аьлар «Сердало» газетага Магӏалбика кхален администраце.
Эскаре тӏахьехара хаттараш дувцарал совгӏа, цига иштта хӏара деннара вахарца дувзаденна дешаш а къоастадир. Къаьстта терко тӏаяхийтар гонахьара ӏалам лорадара. Иштта дийцар ца йоагӏача моттигашка, Махьмад-Хи тӏа кхалажаш гулъеш хиларах. Кхален администраце кулгалхочо Къоастой ӏаддал-Хьамида бехк баьккхар из хьал бахьан долаш, цо иштта тӏадиллар, гаьна ца доаккхаш, цу моттигера хьал къоастадар.
