Магӏалбика кхале дийцар «БАРС» тоаба вӏашагӏйолларах
Гӏалгӏайчен Магӏалбика кхален администраце балха кхетаче хилар, из хетаяь яр «БАРС» яха лоӏамхой тоаба вӏашагӏйоллара. Доал деча даькъ тӏарча кулгалхошца хинна вӏашагӏкхетар дӏахьош вар кхален кулгалхочун декхараш кхоачашдеш вола Къоастой Руслан.
Магӏалбика кхален администраце зарбан болх лелабераша «Сердало» газетага ма аллара, доакъашхоша дийцар моттигера бахархой цу хаттара юкъебахарах, иштта бахархошта юкъе из хоам боаржабарах.
Доал деча даькъ тӏарча администрацешта тӏадиллар шоаш йолча моттигашка хоамий кампани йоаржаяр. Цу даькъ тӏарча кулгалхоша нахаца дукхагӏа кхетаченаш дӏаяхьа еза, царна хьалхадоаккхаш «Барса» хьалаш малагӏаш да, иштта бӏухошта лаьрхӏа вахара аьттонаш малагӏаш да царна дӏахайташ.
Магӏалбика кхален администраце из хьал даим тохкаш да, из тоаба вӏашагӏйоллара хаттар цун тӏахьожам болаш да.
