Кхерамзленца дувзаденнарех йола семинар хилар Магӏалбика кхале
Терроризм яхача доккхача зулама духьала лоаттабе безача къовсамах дувцаш, кхетаче дӏайихьар Инаркъерча культуран цӏагӏа.
«Цу кхетаче дакъа лоацаш бар Магӏалбика кхален администраце терроризма духьале лоаттаеча оагӏон кулгал ду Джамболатанаькъан Мухьмад, кхален кулгалхочун гӏонча вола Хамхой ӏалихан, Росгварде болхло Хьаьшанаькъан Ибрахӏим, иштта юртда Котанаькъан Адам.
Кхетаче гулбеннараша дийцар сага вахара доккха зе деш долча цу зулама духьала малагӏча тайпара болх мишта лоаттабе беза, кхувш латта къонабараш воча наькъах лорабар мишта хила деза, иштта кхыдолча цу оагӏонца дувзаденнарех», - хоам бу «Сердалога» администраце зарбан болх лелабераша.
Къаьстта йоккха терко еш дийцар кагирхошта юкъе из бӏеха гӏулакх даржаргдоацаш кхоачашде дезарех.
Культуран, спорта моттигашка гуллу къонабараш эггара дукхагӏа, цунга хьежжа цу моттигашка болх беш бараш чӏоагӏа фийла болаш, массахана уж нийсача хӏаман тӏахьехаш хила беза. Зуламхоша шоай бӏеха болх дукхагӏча даькъе интернета оагӏонашка гӏолла дӏакхухь.
Къонабарашта, берашта хьалхадаха деза малаш ба ца ховча нахаца бувзаме бувла, цар яхар хьаллаца, теркалде йиш йоацилга, моллагӏа тешаме доаца хӏама зийча ӏалаьмате сиха ӏаьдала болхлошка хоам бе безилга. Вай массане юкъара декхар да из тахан.
