Волейболах йола яхь дӏайихьар Магӏалбика кхале
Дешархошта юкъе волейболах йола яхь дӏайихьар Магӏалбика кхале. Яхьашка дакъа лаца араяьлар ялх тоаба. Хӏара тоабан доакъашхой котало шоашкахьа хилийта гӏерташ чӏоагӏа кадай бар дешархой цу дийнахьа. Гуш дар берригаш дика кийчо яь болга.
«Хьалхарча моттиге эттар Дола-Коарча №7 йолча ишкола тоаба, шоллагӏа моттиг Инаркъерча №12 йолча ишкола кхаьчар, кхолагӏа моттиг а Инаркъерча №11 йолча ишкола спортсменаша яьккхар. Царна тӏахьожаш, къоастам беш хиннар СОШ №25 йолча ишколе физически культуран хьехархо Гуноевгӏар Амиран вар. «Сердалога» из хоам Магӏалбика кхален администрацера бера.
Иштта йола яхьаш кхувш латтарашта юкъе дӏакхахьаро дикка пайда боаржабу. Къона тӏехье спортаца бувзам болаш хилийта гӏерташ, боккха болх лоаттабу тахан кхален моттигашка.
