МагӀалбика кхале дийцар вахара-экономически даькъ тӀара дешаш
ГӏалгӀайчен МагӀалбика кхале яьржа кхетаче дӀайихьар, доал деча даькъ тӀарча кулгалхочо Къоастой Ӏаддал-Хьамида кулгалдеш. Керттера дийца дош дар, ца йоагӀача моттигашка, лаьрххӀа йола бокъонаш а йоацаш, цхьацца йола гӏишлош хьалъеш хилар. Къоастой Ӏаддал-Хьамида белгалдир; цу тайпара хьал юхатоха дезаш хилар а, цун тӀехьа даим терко лоаттае езар а, кхален берригача ӏаьдала болхлоша цхьана дӀабахьа безаш болх ба из, аьнна.
«Къаьстта дийцар кхален доазон тӀа хӏама нахалдаккхара (рекламан) гӀирсаш латташ хилар. Уж лерттӀача хьалашка даха дезаш хилар белгалдаьккхар, тишъенна е тахан лоархӀаме йоаца реклама юкъера дӏаяккхарах, цун ха чакхъяьннайий хьежа везарах, иштта паччахьалкхен, кхален дагалоаттама таьрахьаш цунна юкъе леладар тӀахьожам болаш хила дезарах. Дӏахо дийцар наькъа ганза ахча нийса дӀахьожадарах. Кхетачен доакъашхоша дийцар, никъ тоабеш, никъ Ӏобуллаш, бе безача балхах. Хьалхарча аргӀагӏа терко ергья вахарца ювзаннача моттигашка, урхалленашка, берий бешамашка долхача наькъашта», - аьлар «Сердало» газетага МагӀалбика кхален администраце зарбан болх лелабераша.
Вӏашагӏкхетар дӀахьош баьча балха чаккхе еш, хьал тоадара йола план оттайир. Хӏанз керттера декхар да дика а ший аргӀагӏа а цига яь чӀоагӀо кхоачашъяр, цо дӀадех массайолча оагӀонаша дика къахьегар.
