«Наркотикаш йоаца дуне» яха кхетаче хургья Магӏалбика кхале
Оршот дийнахьа Дола-Коарча культуран Цӏагӏа дӏаяхьа лерхӏ «Наркотикаш йоаца дуне» яха кхетаче. Магӏалбика кхален культран гӏулакхех йола моттиг я из болх вӏашагӏболлар.
«Наркомани яхача зуламах вай къона тӏехье лораяра тӏехьа дӏахьош, лоархӏаме болх ба из. Кхетаче дувцаргда цу оагӏонца кхоачашде дезарех, наркотик яха дохьаж вайна юкъера дӏадаккха дезарах. Къонабараш цу доккхача зуламах лорабар; пайдане, беркате долча гӏулакхашта уж тӏахьехар да керттера декхар», - йоах «Сердалога» из кхетаче вӏашагӏйоллачаргара кхаьчача хоамо.
Наркомани яхача бӏехача гӏулакхах хьокхавеннар, ший ираз доадаь, сердалонга бода никъ хоадабаь саг ва, цудухьа къонабарашца кхетаченаш дӏакхухьаш, наьха вахара наркотик яхача «дохьажо» тӏаоттадечох дувцар лоархӏамеча гӏулакхех да тахан. Культуран цӏагӏа цу оагӏонцара болх каст-каста дӏакхухьаш ба, белгалде деза цох къонабарашта пайда, масал хулилга.
