Гӏалгӏайчен МЧСе дездир мехка граждански оборона 94 шу дизар
Гӏалгӏайче гӏолла йолча Россе МЧС керттерча урхаллене цӏай-кхетаче хилар, из яр лоархӏамеча исторически денна, граждански оборона оагӏув хьакхелла 94 шу дузаш хилара хетаяь. Цига безбир балха ветеранаш, боахама болхлой. Уж ба республикан кхерамзле хӏара денна ӏалашъеш, чоалханеча хьалах бахархой кӏалхарбоахаш лаьттараш.
«Гулбеннараш атта боацача цар балхаца даькъалабувцаш, къамаьл дир Гӏалгӏай Республике гӏолла йолча Россе керттерча урхаллен кулгалхочун декхараш кхоачашдеш волча полковника Шишин Алексея. Цул тӏехьагӏа, подполковника Ганенаькъан Адама хоам бир гулбеннарашка Ерригроссийски штаба граждански оборона кийчон болх дӏахьош хиларах. Из дӏаболургба ардара бетта 7-ча дийнахьа, чакхбаргба 9-ча дийнахьа. Цо довзийтар гулбеннарашта из болх дӏабахьара хьалаш, из кхоачашбара маӏан, иштта дийцар бахархой кӏалхарбахара болх вӏашагӏболлаш хиларах лаьца. Цул совгӏа, довзийтар, граждански оборона Ерригроссийски шомалу болх дӏабахьара хьал, цу юкъедоагӏа сиренаш сагар, иштта хургда радио-телевидене гӏолла аудио-видео хоамаш. Хоам бара болх дӏаболабергба массаза санна», - аьлар «Сердало» газетага Гӏалгӏай мехка гӏолла йолча Россе МЧС ГУ.
Цул тӏехьагӏа, Керттерча урхаллен викалаша нахаца къамаьл дир. Цар, зале баьгӏача наьха массадолча хаттарашта жоп делар, дӏахо болх бара йола оагӏонаш вӏашагӏъехкар.
Кхетаче чакхйоалаш, хӏара денна шоашкара балха дакъа юкъедахьаш белгалбаьннача болхлошта совгӏаташ делар.
