Гӏалгӏайчен дешара, ӏилман Министерстве лоархӏаме декхараш дийцар
Гӏалгӏайчен дешара, ӏилман Министерстве аргӏанара кхетаче дӏайихьар, министра Цхьорой Ахьмад-Башира кулгал деш. Цига дакъа лоацаш хилар республикан доал деча даькъ тӏара дешара моттигаш. Теркама юкъе нийсделар берий кхерамзлен, лакха дикал йолча дешара лоархӏаме хаттараш.
«Керттера терко тӏаяхийтар Цаӏ йола паччахьалкхен экзамен дӏалуш е езача кийчонна. Министра белгалдир, кийчон балхаш, кхетаченаш дӏаяхьар - из ца хилча даргдоацар да, экзаменаш дӏахьош технически кийчо яьйий а, видеотӏахьожам бий а, КИМаш кепа теха кийчдаьдий а ха деза.
Шоллагӏа йола лоархӏаме тема яр дешара моттигашка йӏовхала хьал мишта латт хьажар. Дешара моттигий кулгалхошта хьалхадаьккхад, дешара моттигашка, берий бешамашка йӏовхал ший эшача боарамах лоаттаяр. Цун тӏахьожам лоаттабе безилга. Министра белгалдир, моллагӏа дагадоацаш хьал нийсденна хилча, технически гӏулакха оагӏорахьа сиха терко е езилга», - аьлар «Сердало» газетага Гӏалгӏайчен дешара, ӏилма Министерствос.
Аргӏанара кхетаче чакхйоалаш, доакъашхоша шоай аргӏагӏа дийцар кхо хаттар- исполнительски дисциплина хилар, «Дешар» яха къаман проект кхоачашъяр, дешархой дика дешаш хилар.
Цхьорой Ахьмад-Башира белгалдир, уж деррига декхараш кхоачашдар - из дешара даькъ тӏара хьал дегӏадоаладара бола толам ба.
