Гӏалгӏайчен юртбоахаме дийцар дӏахьоча балха дешаш
Гӏалгӏайчен юртбоахама, кхачан Министерстве дӏайихьар аргӏанара кхетаче. Из хетаяь яр цу боахаме дӏахьоча балха хоадам бола дешаш дувцара. Керттера дийцар дар, боахама хьалхашка латта декхараш кхоачашдар, иштта гуйре тӏайоагӏаш де дезар, яхаш, хоам бу «Сердало» газетага цу боахама зарбан болх лелабераша.
Цига дувца оттадаьча дешашта чудоагӏаш дар кхыдола декхараш а. Боахама чудоагӏача доакъой кулгалхоша дийцар мехка ахархой балха даькъ тӏарча хьалех, кхай тӏара балхаш дӏахьош хиларах.
Белгалдир, деррига балхаш лаьрхӏа хиннача боараме дӏахьош хилар, юртбоахамхой ма хулла шоай низ, хьинар гойташ къахьега дезаш хиларах, цун бахьан да, ара хаоттам хувцалуш хилар.
Къаьстта терко тӏаяхийтар шоай ханнахьа дӏаязбалара. Цига хоадам бир, статистически хоамаш чудала дезача ха къоастаеш. Хӏара даькъ тӏа бехктокхаме хила безараш белгалбир, уж ба деррига хаттараш кхоачашдара тӏахьожам лоаттабе безараш.
Иштта цига дийцар, кастлуш хьатӏадоагӏаш республикан «Дошо гуйре» яха цӏай хиларах. Доакъашхоша из цӏай дӏадахьара бе беза болх белгалбир, цун бехктокхамебараш хержар. Керттердар - из цӏай лакхача боарам тӏа дӏадахьар.
Кхетаче чакхйоалаш гулбеннараш хьежар цхьацца долча сиха кхоачашде дезача хаттарашка. Юртбоахама шу дика чакхдаккхар тийша да, хӏара болхло ше волча даькъ тӏа бехктокхаме хиларах. Берригача кулгалхошта тӏадиллар, хьалхашка оттадаь декхараш кхоачашдара тӏахьожам лоаттабар. Балха даькъ тӏа керттера хьадехар - болх дика вӏашагӏбелла, сиха, дика толам боаккхаш дӏабахьар.
