Бахархой хаттараш доашхаш хилар юртбоахама министерстве
Бахархой тӏаийбу ди дӏахьош хилар юртбоахама гӏулакхех йолча министерствон кулгалхочун гӏонча вола Харсенаькъан Къурейш. «Сердалога» из хоам бир цу моттигера.
«АПК оагӏонца дувзаденна дола лоархӏамедараш доашхаш болх дӏабихьар кхетаче. Паччахьалкхен программашка дакъа лацарца, фермерски боахамашта гӏо дарца, юртбоахама гӏулакхашта лаьттан доазонаш къоастадарца, иштта юрташка бахача наьха хьал аттачахьа даккхарца дувзаденна дар мехкахоша тӏакхихьа хаттараш», - йоах тхога бенача хоамо.
Харсенаькъан Къурейша хӏара сага къувлараш тохкаш, доашхаш болх дӏабихьар цу дийнахьа. Цхьацца проекташ йоаржаеча де дезараш хьалхадоахаш, министерство гӏо делга хьалхадаьккхар бахархошта. «Иштта йола кхетаченаш хан-ханнахьа дӏакхахьар лоархӏаме да юртбоахама оагӏонна.
Цхьаккха хаттар дусаргдац ца тохкаш, боаггӏаш бола болх дӏа ца хьош. Лаьттанца къахьега ловш мел волча хӏара сага оагӏув хьаллаца кийча да тхо», - аьлар республикан ахархой викала.
Пайданегӏа, беркатегӏа хургдолча тайпара цу оагӏонцара болх хьаоттабар министерствонна хьалхашка латтача керттерча декхарех да. Цунца дувзаденнараш кхы а дикагӏа тоадеш къахьега лерхӏ мехка.
