Гӏишлошъяра министерстве дийцар, культуран моттигаш хьалъярах, тоаярах
Гӏалгӏайчен гӏишлошъяра Министерстве, республикан культуран моттигаш хьалъяра, уж тоаяра долча дешашта хетаяь кхетаче дӏайихьар. Цига кхетаче йолаш, гӏишлоншъяра министра Иленаькъан Мусай къамаьл хилар болх беча тоабай викалашца, технически тӏахьожама говзанчашца. Карарча хана, тӏахьожам лоаттабеш я ийс гӏишло. Ше цига хинначул тӏехьагӏа, Иленаькъан Мусас белгалдир, цхьайола моттигаш йиллача ханал тӏехьаюсаш хилар. Цо хьадийхар болх берашкара мел бола низ оарцагӏбаьккхар, балхаш шоай ханнахьа чакхдахар.
«Магӏалбике, масала, дукха догӏаш делхар бахьан долаш; искусствай берий ишкола кӏалха кӏийле еш кӏоаг баккха дукха гайра. Гӏишлонна тохкам баьб, болх бергбарашца бартчӏоагӏам оттабаьб, лаьттанцара балхаш дӏадоладаьд. Бакъда даим догӏаш латташ хиларах, дукха халонаш нийслу, цудухьа болх соцабе безаш хул.
Иленаькъан Мусас декхар тӏадиллар, баьккха кӏоаг сиха тӏера дӏакъовла, абнна, догӏа тӏагӏолла дӏаухаш хургдолаш. Цо белгалдир, хиво лаьтта коачделга, тӏаккха кӏоаг а чухарцар кхерам болга», - аьлар «Сердало» газетага мехка гӏишлошъяра Министерствон зарбан болх лелабераша.
Магӏалбике искусствай ишкола хьалъеш я овлангара. Йистеяьлча, цох тӏехьара тӏа долча дешара хьалхале лелаю моттиг хургья. Магӏалбика берашта, кхувш боагӏарашта укхаза ашарий, хореографе, исбахьален искусствай, кхыча кхоллама доакъош тӏа дика дегӏаахара масса оагӏорахьара хьалаш хьакхеллад.
Кхетаче йолаш, къаьстта терко тӏаяхийтар гӏишлон министра маьтсела бетта дӏадоладаьча балхашта, уж хӏанз чуийнна дӏахьош да. Царех да Наьсарен культуран Цӏа, вай къам мехкахдаккхара дагалоаттама Мемориала комплекс.
Министра белгалдир, еррига чӏоагӏъяь проекташ, Гӏалгӏайчен гӏишлон Министерствон даим тӏахьожам болаш я. Технически хьала тӏахьожам лоаттабеча говзанчашта тӏадиллад; балха дӏайохийташ йола материалаш дикал йолаш хилийтар, болх чакхбаккхара йилла ха лорае хьажар, культуран объекташ шоай ханнахьа а дикал йолаш а чакхъяхар.
