Коталон Цӏай – маьтсела бетта 9-гӏа ди дезде кийчлуш ба мехка
Маьтсела беттацара цӏайш дезде кийчо еш ба тахан мехкарча моттигашка. Цу цӏайшта, къаьстта Коталон Денна терко еш йола кхетаче дӏаяхьа гулбелар Наьсарен кхален администраце.
«Лоархӏаме боламаш доаржадарах, дагалоаттама кхетачен юкъе дакъа лацара бахархой тӏахьехарах, иштта цӏай дездеча деношка кхерамзлен хьалаца дувзаденнарашта лакха терко лоаттаярах дийцар гулбеннараша.
Кхетаче дакъа лоацаш яр кхален администраце вахара гӏулакхех болча оагӏон кулгал ду Саганаькъан Мадина, РО «Хьалхарбарий болам» яхача оагӏонцара викалаш, РДК кулгалхо Дзейтанаькъан Темарлан, ФОКий кулгалхой», - йоах тхога бенача хоамо.
Исторически дагалоаттамца, къонабарий Даьхенцара безам чӏоагӏбарах болча оагӏонца дувзаденнарех дийцар цига, белгалдир малагӏа тайпара кхетачеш дӏаяхьа еза. Цӏайш дездара гӏулакх боаггӏача боараме, кхерамзлен хьал лорадеш, массадола оагӏонаш теркалдеш, чакхдаккхара тӏехьа къахьегаргда мехка.
