Мужеча, къоаной Ди долаш, боккхача дезала нана белгалйир
Ардара бетта 1-ча дийнахьа массаза белгалдеш дола къоаной Ди дездир Гӏалгӏайчен Шолжа кхален Мужечарча кульутран Цӏагӏа. Хьалха санна ловца баьккха а ца ӏеш, культуран моттига болхлоша вӏашагӏъеллар «Дошо ноахал: хьаллоацаш, лоархӏаш» яха дика болам. Из лаьрхӏа бар керда ноахал кхедаьча хӏара сагага кхоачаш новкъостал дара.
«Цунна чудоагӏаш, тха болхлой накъабахар цу моттиге яхача Гӏайтакханаькъан Вахӏидата- из я цу юрта бахача наха лоархӏаш, боккъонцахьа йола нана, иштта цӏена ба цун вахара никъ. Вахӏидата кхеваьв бархӏ дезалхо. Цу тайпара хӏара денна къахьегаш, терко лоаттаеш, эшачунца ӏалашо еш лерттӏа дезал хьалкхебар массаза а хиннад гӏалгӏашта юкъе лоархӏаш», - аьлар «Сердало» газетага Мужечарча культуран Цӏен кулгалхочо Харсенаькъан Мурада.
Цу наьха терко яра кхоллама коллективо лаьрхӏар, массаза санна совгӏат денна а ца ӏеш, уж нах ахчанца новкъостал деш безбе. Из моттиг вӏашагӏъеллачар яхачох, из къаьстта иштта деш хилара бахьан да къоаношта дукхагӏа накъаяргйола оагӏув хьаллацар, цо ший цӏагӏара хаттараш аттагӏа кхоачашдергдолаш.
Культуран болхлоша белгалдир, цу тайпара лерхӏам бар, из духхьал саг лархӏар хинна ӏац, из да цунцара дийна бувзам лелабара деш. Боккхий нах массаза а лоархӏаш ба Мужеча, уж ба къаман ӏадаташ лорадераш, нийса вахара никъ хьехараш. Къаьстта цудухьа уж лархӏа беза цӏай долаш а доацаш а.
Мужечарча культуран Цӏен болхлоша дег тӏара даькъалайийцар Вахӏидат, из могаш, ираз долаш дукхача шерашка яхар ловш.
