Чурча гӏулакхех болча оагӏон болхлой Ди дездеш хилар мехкарча МВД
РФ чурча гӏулакхех болча оагӏон болхлой Ди дездеш, кхетаче хилар вай мехкарча Россе МВД. Цига гулбеннабар республикан кулгалхой, ӏаьдала болхлой, иштта МВД ветеранаш. Лоархӏаме хьаьша волаш, цига вена хилар мехкада Келаматанаькъан Махьмуд-Ӏаьла, иштта Халкъа Гуллама спикер Гаьгенаькъан Руслан, мехкарча ФСБ оагӏон кулгалхо Шевляков Максим, Тохкама Комитета хьалха латта Асхабов Ахьмад, Росгварде кулгалхо вола Буружанаькъан Мухьмад, мехкара прокурор Васильченко Андрей.
Полице болхлой цу цӏайца даькъалабувцаш, Мехкадас белгалдир цар дӏахьош бола болх лакха терко, низ, денал, яхь эшаш болга. Келаматанаькъан Махьмуд-Ӏаьлас теркалдир мехкарча бахархой кхерамзлен хьалаца дувзаденнараш боаггӏача боараме хилийтар, паргӏато, машар лорабар цар лоархӏаме декхар долга. Республикан кулгалхочо хьоахадир, дукхача шерашка деналца, майралца шоай декхараш токхаш лаьттача ветеранашта, балха тӏа вахар хаьдарий дезалашта терко лоаттаяр тахан лоархӏаме долга.
Моттигерча МВД кулгалхо волча Котов Владимира баркал аьлар шийна тӏехьалаттарашта, шоай декхараш бехктокхаме кхоачашде хьожаш къахьегарах, иштта цар оагӏув хьаллоацаш болча цӏагӏарбаршта а. Таханарча дийнахьа МВД 1600 болхло тӏема моттигашка дакъа лоацаш хиннарех ва, царна юкъе ба тӏема операце доакъашхой - 42.
Белгалде деза, бархӏ саг паччахьалкхен совгӏаташ луш белгалваьлга. Мехкадаь грамоташ елар цӏай дездеча дийнахьа МВД къахьегамхошта Ӏарчакханаькъан Самата, Беканаькъан Азамата, Вешкаранаькъан Ахьмада, Мутӏаланаькъан Ӏаьланна, Томбенаькъан Азамата. Иштта лаьрххӏа баркал кхайкадеш мехкадаьгара каьхат делар мехкарча РФ МВД юкъарча моттигашкара нийсхо лораярах болча оагӏон кулгалхочун гӏонча волча Кувалдин Василена.
Балха декхараш кхоачашдеча наькъ тӏа вахар хаьда полице къахьегамхой дагалаьцар гулбеннараша.
