Гӏалгӏайчен Къаман библиотеке хьабийллар музейшта хетабаь гойтам
Дерригача дунено дездеш да Халкъашта юкъера музейшта хетадаь ди - из цӏай хиларо вӏашагӏтох дӏаяха, карара ха. Цу дийнахьа, музеяша дерригача дунен тӏа хьаелл миллионаш болча наха шоай наӏараш, уж бех исторе, искусствон, ӏилман оагӏонаш йовза. Гӏалгӏайчен, Янданаькъан Жамалда цӏерагӏа Къаман библиотека а юстара йисанзар цу гӏулакха, цо кийчбир лаьрххӏа бола книжкай гойтам.
«Тха гойтамо тӏахьех вай юкъарло керттера вай тӏехьале лораяра, хьамсарча мехкара истори ӏомадара. Гойтаме го йиш я дукха йоазош, Гӏалгӏайчен музейшта хетадаь балхаш, цар къаьгга дувц гӏалгӏай халкъа лакхача культурах. Гойтама керттера моттиг дӏалоацаш да цӏихезача Малсаганаькъан Б.
«Гӏалай, легендай мехка» яха суртий альбом, цо къаьгга хьагойт къаман юкъерча бӏаьшерений архитектура. Иштта наха гойта оттабаьб Гольдштейна А. «Лоамашка гӏалаш» яха болх, цо тохк гӏалгӏай тӏехьаленцара материальни культура, Кавказа вахар. Цу дерригне а дика гойт гӏалгӏай ӏадаташ, искусство», - аьлар библиотеке «Сердало» газетага.
Къаман библиотеке гойтам дӏабахьар - из дика таро я, музея балхага гӏолла гӏалгӏай культура мах бараш бӏаргагора, иштта кхетадара, уж вай тӏехьенна хургдолаш лорадар лоархӏаме да.
