Гӏалгӏай Къаман библиотеке «Халхара дуненга вуга никъ» яха гойтам хьабийллар
Янданаькъан Жамалдий цӏерагӏча Къаман библиотеке болх бе болабелар «Халхара дуненга вуга никъ» яха гойтам. Из гойтам хетабаь ба Халкъашта юкъерча халхара денна, цо бех дешархой халхара говзал йовза.
«Цига го йиш я наггахьа мара гойтаме оттадеш доаца сурташ, архивера каьхаташ, цар хоадам боллаш дувц гӏалгӏай халхар хьакхолларах. Дукхача ханашка денз гӏалгӏай халхар духхьал хьажара белгало йолаш хинна ӏийнадац, из хиннад физически, эхь-эздела дегӏаахара бола низ лоархӏаш. Дегӏа маьженаш лелае ховш хиларо хьагойташ хиннад сага оамал миштий, цун эздел, нахацара лерхӏам. Из, зӏамига волча хана денз, хьаэцаш хиннад, цу юкъедоагӏаш хозал, денал, дикал», - аьлар «Серадло» газетага ГӏР НБ.
Гӏалгӏай халхараш- уж къаман оамал, халкъа денал, ӏадат, совлен дола хӏама цалеладар гойташ йола оагӏув я. Цӏихезача Кавказа тохкамхочо Иоганн Бларамберга ший балхашка язду: «Цар халхар - из ший тайпара хӏама да». Из иштта гойт библиотека стеданташка оттаяьча материалаша.
Гойтам безалургба профессиональни халхарчашта, иштта Гӏалгӏайчен культуран тӏехьале йовзаш болча наха. Гойтам дӏабахьа лерхӏ, маьтсела бутт чакхбаллалца.
