ГӏалгӀайчен Къаман библиотеке дӀахьоргда «Терроризма духьала цхьана» яха сахьат
ГӏалгӀайчен Янданаькъан Жамалда цӀерагӀча Къаман библиотеке, хьатӀадоагӀача шоатта дийнахьа, «Терроризма духьала цхьана» яха бокъонаш лораяра сахьат дӀахьоргда, из дукхагӀа доагӀаш да кагирхошта, кхувш боагӀарашта. Кхетаче дӀаяхьара маӀан да - кагийбарий бокъонех бола кхетам лакхбар; терроризма, экстремизма ийрча хьал царна довзийтар; иштта чоалханеча хьалашка кхерамзлен оагӀонаш лаха уж Ӏомабар.
«Кхетачене дакъа лоацаш хургба Шолжа-Шахьара администраце, дин викалаш; бокъонаш лораю ӏаьдала болхлой. Цига дувцаргда терроризма, экстремизма профилактика яра болх кагирхошта юкъе дӀабахьар, кхувш боагӀарашта юкъе из зулам доаржаргдоацаш, уж цу ийрчача гӀулакха тӀехьа хургбоацаш хьехам беш хилар», - аьлар«Сердало» газетага ГӏалгӀай Республикан НБ.
Терроризм - из таханара, эггара унзарагӏа дола хьал да. Шоай малагӀа никъ лелабе беза ховш хиларо, бокъонаш йовзаш хиларо, законо дӀадехар леладаро таро лургья кагирхошта цу гӀозара юкъе ца бала.
