Гӏалгӏайчен Къаман библиотеке болх беш ба, Магаса Денна хетабаь гойтам
Янданаькъан Жамалда цӏерагӏча Гӏалгӏайчен Къаман библиотеке болх беш ба Магас-Шахьара Денна хетабаь гойтам. Из ханага гӏолла дола наькъа вахар да, къаьнарча исторен оагӏонашкара таханарча республикан столицага кхоачаш. Магас, цу деша маӏан дича, «Маьлха-Шахьар» яхилга да, цунна чудоагӏаш да ӏадаташ, таханарча ден хьинар. Дунен эггара зӏамагӏа йола шахьар - из хьалъэттар цхьан хана Аланий къаьнара столица хиннача даькъ тӏа.
«Гойтаме ба «Магас. Археологически а йоазоний а гӏирсашка» яха Коазой Нурдина баь боккха болх, Коазой ӏийсай роман-эпопея «Даькъала Магас». Цига иштта го йиш я бесашца даь суртий альбомаш, хоамий буклеташ, Гӏалгӏайчен дагалоаттама моттигаш, шахьара исторех йола материалаш», - аьлар «Сердало» газетага библиотеке.
Шахьара хьалхара кхера ӏобиллар 1994 шера саькура бетта 23-ча дийнахьа Гӏалгӏайчен хьалхарча Президента Овшанаькъан Руслана. Гойтаме баьхкача наьха таро я, яьссача ара ткъаь итт шера административни, культуран центр, ший белгалонца - Барта Гӏалаца хьакхоллар го.
Гойтама чудоагӏаш да шахьарах дувцаш дола хӏамаш, цун архитектуран керттерачох, тахан цун хургдар хьакхоллаш болча нахах дувцаш йола оагӏонаш.
