Гӏалгӏай Къаман библиотеке дӏахьош да ӏV-гӏа Янданаькъан дешар
Гӏалгӏай Къаман библиотеке дӏахьош да ӏV-гӏа Янданаькъан дешар - республике белгалду сий долча поэта-лирика, республикан халкъа поэта Янданаькъан Хамарзий Жамалда ваь 110 шу дузаш хилар.
Янданаькъан Жамалда- наха дика вовзаш, тӏаэцаш вола классик вар, из вар гӏалгӏай советски поэзи хьакхелларех хьалхара, иштта республике халкъа цӏи енна хьалхара поэт. Цун поэзи кӏоаргга духлохам болаш, дег чура Даьхе езарех из хилар гойташ яр, из гӏалгӏай къаман культуран цхьа дакъа хинна дӏаэттар.
Цо дувцар хьамсарча лоамий сий, мехкахой денал, сага бувзамий лоархӏам, Даьхенцара безам. Янданаькъан Жамалдас дунен дукхача къамий йоазошта таржам дир, цо хьайийллар миллионаш болча наха Гӏалгӏайчен культура.
ӏV Янданаькъан дешаро, Къаман библиотека майдан тӏа гулбир цӏихеза литературоведаш, йоазонхой, юкъарлон, культуран болхлой, студенташ, говзанча кхоллам безараш.
Цӏай программа чуйоагӏаш я ӏилман докладаш, дагалоацамаш, цига Гӏалгӏайчен тохкама болх дӏахьораша поэта биографех, цун лирически тӏехьален исбахьален белгалонех дувцаргда.
Къонача автораша, дешархоша гӏалгӏай, эрсий меттала ешаргья Янданаькъан Жамалда дикагӏа йола байташ, хӏаьта Къаман библиотека болхлочо кийчъяьй поэта балха оагӏув, цун архивни сурташ, материалаш.
Из болх вӏашагӏбеллараша белгалду, Янданаькъан дешар дӏадахьара керттера маӏан, гӏалгӏай къаман воӏ дагавохарал совгӏа, цун ший белггала йола литературан тӏехьале кхувш йоагӏача тӏехьенга кхачийтар да.
