Наьсаре керда аллея хьакхолларгья, 153 млн мах болаш
Наьсарен-Шахьара хьал тӏехьарча хана тоалуш доагӏа. Коашкара лостамаш даьчул тӏехьагӏа, хӏанз йоккха проекташ кхоачашъе йолаелар шахьар, юкъарлон моттигаш укх заман салоӏама доазонашта тара я. Из болх дӏабахьа таро хилар 2025 шера доал деча даькъ тӏарча администраце федеральни программашка дакъа лацарах, цар гранташ яхар бахьан долаш.
Керттера толам ба цу юкъе, шахьара ӏама доазон тӏара хьал хувцадалар. Цо чулоац 10,5 гектар доазув, из доазув тоадара дӏадодар да 143 миллион сом. Уж таронаш администраце хилар, шахьара дика хьалаш яхача Ерригроссийски яхье котъялар бахьан долаш. Иштта дӏахьош да наха салоӏаш йола моттиг тоаяра балхаш а – Малсаганаькъан Кӏарцхала цӏерагӏа культуран, салоӏама парк. Из тоаяра дӏадодаш да 35 миллион сом совгӏа, из вӏашагӏтехад федеральни субсиде, доал деча даькъ тӏарча бюджета, доалахьарча инвестицей ахчах.
Кердача шера шахьара юкъарлон моттигаш тоаяра балхаш лаьгӏлургдац. Керттера гӏишло хургья «Коталон аллея». Из эггара дукхагӏа ахча дӏадодаш яр я шахьара: цига дӏагӏоргда 153 миллион сом. Цунга дӏадодаш дар дукхача оагӏорахьара вӏашагӏтохаш да: федеральни, республикански, моттигера бюджеташ, иштта бюджетера йоаца таронаш.
Меъхка кулгалхоша белгалду, керттердар республикан шахьарий цаӏ йола кеп еш хилар да. Керттера маӏан –– къаман проекташ вӏашагӏтохар, цо таро лургья Гӏалгӏайчен бахархошта, дика вахара хьалаш а долаш, йоккха паччахьалкхен таронаш хьакхолла.
