ӏарпенаькъан цӏерах йолча колледжа тӏабода никъ тоабе лаьрхӏад Наьсаре
ӏарпенаькъан цӏерах йолча политехнически колледжа тӏабода никъ тоабе болалургба; ара дӏайха, болх бе йиш йола денош хьаоттарца. Из хоам «Сердалога» бир шахьара мэре.
«Южни оалача урама хьал тахка ваха хилар шахьара да Оздой Руслан 2025-ча шера. Цигарча бахархошца къамаьл дир хьакима. Никъ боаггӏача боараме ӏобилла аьттув хургболаш, шоай карташ кӏеззига дӏачуоза раьза хилар нах.
Дӏадаха шу чакхдала гарга гӏертача хана, ӏобиллар цига 280 м дӏоахал, 1,80 м шорал дола гӏашлой никъ. Цу урама хьал дикка меттадоаладе лаьрхӏар шахьара дас, 2026-ча шера кхоачашъе езача проекташта юкъехьош», - йоах тхога бенача хоамо.
Иштта, асфальт ӏобуллаш, дикка кулг тоха дезарех ба Московски оала урам а. Йӏовхал хьаоттарца дӏаболабе лерхӏа болх ба из. Цу гӏулакха кийчо еш, моттиг хьааьхка кабельни канализаци чуйиллай, ПАО «Ростелеком» я из болх дӏахьор. Гӏум, жагӏа тоссаш; кӏалхара кӏийле балхага кийчъеш баьхкар цига.
