Наьсарерча 10 урам тӏа керда асфальт булларгба укх шера
Шахьара дас Оздой Руслана кулгал деча кхетаче, укх шера асфальт буллаш тоабергбола итт урам белгалбир. Из хоам «Сердалога» бир мэре.
«Шахьарера урамаш боаггӏача боараме хилийтара тӏехьа къахьег тахан. Хӏара сом кходеш, нийса дӏадахийта хьожаш да тхо. ӏобуллаш бола никъ дуккхача шерашка бохаргбоацаш, лерттӏа хилийта гӏерт. Бахархой хьал аттача доаккхаш хургда из гӏулакх», - белгалдир мэра.
Хувцамаш дӏадахьа лерхӏ Мошхой, Железнодорожни, Вокзальни, Свободы, Граждански, Южне, Назрановски, Эсамарзанаькъан, Гӏазданаькъан, Хамхой урамашка. Шахьара дас ше тӏахьожам беш, дӏахьоргда уж балхаш. Наькъаш боаггӏача боараме тоадаь, дуккхача шерашка наха паргӏато еш хила деза. Хамхой цӏерах бола урам шахьара моттигаш тоаярах йолча федеральни проектага гӏолла тоабергба.
