Наьсарерча кхувшбоагӀарий йоакхо яр, кхелахой тӀахьожам болаш да
Наьсарен мэре дӀайихьар кхувшбоагӀарий гӀулакхех, цар бокъонаш лораярах йолча кхела ялхлагӀа кхетаче, аьлар «Сердало» газетага шахьара администраце.
«КхувшбоагӀарий гӀулакхех йолча Кхела аргӀанара кхетаче хилар, шахьара Ӏаьдала викалаша кулгал а деш. Цига дийцар керттера хаттараш, уж дувзаденна дар кхувш йоагӀача тӀехьен хьашташ лорадарца», - аьлар хоамо.
Цига лаьрхӀар массайолча оагӀорахьара новкъостал лоаттаде: кхувш доагӀача ноахала хьашташ довзарца, шийна сага кулг тӏахьош дола гӀулакх юкъерадаккха къахьегарца; кхетам балара даькъ тӀа царна хьехамаш дарца, административни практика юкъейоалаярца. Иштта цу лоархӀамеча балха кхыйолча оагӀонех дийцар цига.
Цар даьшта-ноаношта, царна тӀехьа латтача викалашта йоагӀаш йола материалаш дика Ӏомайир Кхело. Царна хьалхадаьккхар массайолча хана терко тӀайохийташ хила безилга берашта лерттӀа кхетам балара, уж нийса кхедара болх.
Иштта даьй-ноаной, беррига боккхагӏбараш тӀахьийхар шоай берашка хьажара; царца дагабоалаш, барта хилара; эшача уж хьаллацара моллагӀа йола халонаш эттача а царна накъаболхаш, гӏо деш хилара.
