Наьсаре дийнъеш, йӏоахаеш, баьццаръерзаеш къахьега лерхӏ мэре
Наьсарен мэр волча Оздой Руслана шийна хьалхашка оттадаьча керттерча декхарех да, шахьара моттигаш баьццаръерзаеш, болх дӏабахьар. Из хоам «Сердалога» бир мэре болхлоша. «Шахьарерча моттигашка тайп-тайпара гаьнаш, кӏотаргаш, зизаш дӏадогӏаш, боккха болх чакхбаккха беза.
Даьд аьнна алийта, хозача сурташта лаьрхӏа доацаш, вайна массанена, вай берашта лаьрхӏа. Шахьара моттигаш дийна, баьццара, бӏарга тоам беш хила еза. Урамашка, ишколашта, маьждигашта, дарбанченашта юхе ма хулла дукхагӏа гаьнаш дӏайогӏа еза. Тахан йаьсса, цхьа чам боацаш латта моттигаш наха ӏи, цӏена фо хургдолаш, дега тоам беш хургйолаш тоае еза вай», - белгалдир шахьара дас, Наьсарен моттигаш тоаярах долча къамаьла юкъе. Гаьнаш, кӏотаргаш, зизаш дӏадогӏаш тоае лерхӏа моттигаш тахан къоастаяьй.
Шахьара хьал «баьццара кӏувс» тассарца тоаде лерхӏ бӏаьстан юхьиг хьаоттарца. Къоахка, хьеха, шолха, датта, гӏиринга гаьнаш дӏайогӏа лаьрхӏад шахьара Мутаӏаланаькъан, Гӏайрбик-Хьажа, Московски, Тӏонганаькъан цӏераш лелаеча урамий моттигашка. Ши бӏаь совгӏа га я дӏайогӏа лерхӏараш.
Иштта скверашка, наькъа оагӏонашка гӏолла кӏотаргаш дӏайогӏаш къахьегаргда, болх дӏахьоча моттигий ковнаш тайп-тайпарча зизашца куц тоадеш хоздергда. Ахкан деношка царна хан-ханнахьа хий детташ, болх дӏакхахьара гӏулакх а къоастадаьд мэре.
