Наьсаре дӏайихьар спортсменашта лаьрхӏа допинга (молхашта) духьалара семинар
Гӏалгӏай Республикан спортивни латара Федераце Магасе дӏайихьар хьехама кхетаче, из хетаяь яр цӏенача спорта хаттарашта, иштта цунна хьалхашка оттаяь бокъонаш лораяра.
Йовлой Берда цӏерагӏча «Магас» спорта Цӏагӏа гулбелар тренераш, шоай лоӏамеча латара, эллиной-румий хьисапе летараш, уж ба республикан тайп-тайпарча спортивни урхаллений викалаш.
Дешара программо таро елар спорта даькъ тӏа антидопинга керттера хьал ма дарра къоастаде.
Спортсменашта хьалхадаьккхар Дерригача дунен допинга духьаларча кодекса керттердар малагӏа да, иштта йовзийтар цун бокъонаш. Уж хӏара профессиональни атлета ха езаш я, аьнна, белгалдир.
Семинар дӏахьош дийцар, допинга духьалара бокъонаш телхаяра оагӏонех лаьца, цу юкъе аьлар могаеш йоаца молха лелае бокъо йоацилга, шоай ца тохкийташ ӏе йиш йоацилга, харцо ювца йиш йоацилга, керттердар «бехктокхам чӏоагӏа хилар», БАДаш цалелаяр.
Цунца цхьана латархошта хьалхадаьккхар, еррига лорий молхаш цкъа хьалхагӏа миштай ха дезилга, иштта дийцар нагахьа спортсмен могаш воацаш вале, уж молхаш терапевташ хьа язъяр мишта хила деза. Хоамий дакъа чакхдоалаш, доакъашхоша шоаш цига ладувгӏаш хьаийцар чӏоагӏдир, хӏаранена лаьрхӏа дола семинар дӏайихьа хилара тешал деш дола сертификаташ делар.
