Наьсаре дӏайолаелар шахьара 245 шу дизара хетаяь салоӏама моттигаш
Наьсаре ший 245 шу дизара дездеш я, хьалхара хьаьший тӏаэцаш. Малсаганаькъан Кӏарцхала цӏерагӏча парке, цӏай дездара майда йоаржайир. Цига хьабоагӏача наха лаьрхӏа гастрономически фестиваль, халкъа кулгаговзала балхаш дерий ярмарка хургья. Ерригача Даькъасте кулгаговзанчаша, кулинараша шоай дикагӏа дола балхаш гойтаргда, массаза санна хьаьшашта лаьрхӏа даараш хургда. Укхаза йоаржаяьй интерактивни гойтама оагӏув, иштта говзанча хьехамаш.
Цӏай кхетаче тӏехь-тӏехьагӏа дукхагӏа нах хьаухаш дӏайолалуш я. 15:00 сахьат даьлча берашта лаьрхӏа салоӏама программа хургья, 15:30 сахьат даьлча «Сигаленал лакхагӏа» яха фегара шоу хургья. 16:00 сахьат даьлча лаьрххӏа хьаелларгья ма ярра кердаяьккха Малсаганаькъан Кӏарцхала цӏерагӏа парк. Доккха цӏай- концерт дӏадолалургда 17:00 сахьат даьлча, культуран Цӏен хьалхашка. Из кхетаче дӏахо дӏаяхьар дезарашта гастрофестивало кхоана 10:00 сахьат даьлча ший болх дӏахохьоргба.
Белгалду, иштта йоккха кхетаче дӏахьош хиларца дувзаденна, ардара бетта 16-17-ча деношка шахьаре машинаш лелара никъ хувцалургба. Автомобилаца болча наха шоашта хьалххе а гобаьккха цига хьабахка йиш йола никъ лаха беза, хӏана аьлча Овшанаькъан, Темарханаькъан урамаш хотталуча ГОВД юхе, иштта Базорканаькъан проспекта, Машинашъерий урама даькъ тӏа, «Седало» Кепайоазон цӏен хьалхашка, «Маяк» мах бара даькъ тӏарча Фабрични урамах никъ къайла хургба.
