Терроризм, экстремизм яхача зуламах дийцар Наьсарерча КСИБа студенташта
Вахарерча тайп-тайпарча оагӏонех йолча (КСИБ) Наьсарерча колледжа студенташта дийцар терроризм яхача доккхача зулама духьале лоаттаярах. Из хоам «Сердалога» цу моттигера бера.
«Къонабарашка дийцар, из зулам доаржаде гӏертараша цу юкъе чуозараш хӏетта кхийнараш болга. Кагирхой гӏулакхех йолча комитета, «Даьхен лорабой» яхача ганза, иштта «Иман» яхача воча оамалех верза гӏо деш йолча моттига доакъашхой бар студенташца къамаьл дӏахьош хиннараш. Къонабарашка дийцар наркотикаша сага вахар толхадарах, ираз доадарах, цкъа бӏехача, воча хӏаманца ший вахар толхадаьчоа тӏехьа тӏайоагӏача хана тешаме саг хинна наха юкъе дӏаотта хала хургдолга. Интернета оагӏонашка гӏолла бӏеха зулам доаржаде гӏертарашца цхьаккха тайпара бувзаме вала, цар яхар теркалде йиш йоацилга, моллагӏа тешаме доаца хӏама зийча ӏалаьмате сиха ӏаьдалга хоам бе безилга хьалхадаьккхар гулбеннараша», - яхаш, хоам бу тха газетага.
Кагирхой гӏулакхех йолча Комитета АНК оагӏонцарча болхлочо Тиймарзанаькъан Ахьмада яхачох, къонабарий кхетам ца талхийта, воча оамалех уж лорабе, беркатеча хӏаман тӏахьеха гӏерт уж.
