Мехкадаьгара баркал оалаш, каьхат делар МВД ветерана
Россе Наьсарерча ОМВД ветераний оагӏонна хьалха латта Бузуртанаькъан Ваха МВД дукхача шерашка къахьегаш хинна Дзейганаькъан Оарце Ӏийса волча ваха хилар. Чӏоагӏа безаме, ветерана дог хьоасташ кхетаче хилар цох. МВД ветераний оагӏонцарча балха юкъе лоархӏаме моттиг дӏалоацаш да из гӏулакх. Юкъера бувзам цахадийтар, МВД бехктокхаме къахьегаш лаьттараш дагабохаш хилар да из.
«Дукхача шерашка ӏаьдала балха тӏа волаш, шийна тӏадаьхка декхараш бехктокхаме, боагӏача боараме кхоачашдеш, мехкара кхерамзлен оагӏонцара хьал лорадеш, хӏама кегацадалийтара тӏахьожам беш лаьттача Оарце Ӏийсайга, мехкадаьгара баркал кхайкадеш, каьхат дӏаделар Бузуртанаькъан Вахас.
Ветераний оагӏоно гӏо деш, дукха ха йоацаш тока саьргаш хийцадар цун цӏагӏара. МВД болх беш хиннача наьха оагӏув хьаллацар да из», - дийцар «Сердалога» Россе мехкарча МВД зарбан болх лелабераша. Дукхача шерашка МВД декхараш кхоачашдеш, дика цӏи тӏехьа йолаш лаьттача ветеранашца бувзам лоаттабар лоархӏаме, цар даьча гӏулакхий хам беш хилар да. Доккха маӏан долаш кхетаченаш я уж. Ӏаьдала балха къахьегаш дукха шераш ӏодаьхкача ветеранашкара хьаэца, ӏомаде дукха да.
