Кхалнаьха куц тоадеш йолча моттига даьча довнах, зуламхошта духьала гӏулакх хьадийллад Наьсаре
Кхалнаьха куц тоадеш йолча Наьсарерча салоне чухьийлха, цу чу болх беш йолча кхалсага даьча довнах, ӏаьдало гӏулакх хьадийллад. «Сийна гӏишло» оалача ТЦ йоаллача «Люкс» салоне хиннад интернета оагӏонашка даьржа дола из хатар. Шин маӏача сагаца хиннача массехк кхалсага салоне чулийлха, цу чу болх беш йолча кхалсага йийттай; цул совгӏа, тепча урагӏъетташ дӏабахаб. «Сердалога» из хоам мехкарча прокуратурера кхаьчаб.
«Юкъарча моттигера бокъонаш толхаеш, наха юкъе кхерам боаржабеш, герз юкъедолаш кхостадаьча цу хьаштдоацача, ийрчача гӏулакхах тохкам дӏахьош хилар ӏаьдала викалаш. РФ УК 2-ча даькъа 213 ст. гӏулакх хьадийллар Россе ОМВД тохкама оагӏон болхлоша. Наьсарерча прокурор Чербажанаькъан Ибрахӏим хьежар гӏулакх хьаделлар бух болаш дий. Чулийлхараша салонера кхалсаг ювргья, яхаш, тийсача кхерамах РФ УК 119 ст. гӏулакх хьаделла, аьнна, тӏадиллар цо», - дийцар тха газетага.
Дукхача наха юкъе кхерам боаржабеш, из бокъо йоаца хӏама леладаьраш биззача боараме бехктокхаме оза лаьрхӏа ба мехка. Чулийлха, сага еттарах РФ УК 2-ча даькъа 213 ст. диллача, 7 шу суд я йоагӏар; хӏаьта саг вувргва, яхаш, кхерам тувсарах, РФ УК 1-ча даькъа 119 ст. диллача, ши шу суд йоагӏа.
