Олимпийски совгӏат деннача Кхоартой Калойна хетаяь яхь дӏайихьар Наьсаре
Олимпийски ловзарашка «дотув» доаккхаш котваьннача Кхоартой Калойна хетаяь мехкашта юкъера йийлла яхь дӏайихьар Наьсаре. Из хоам «Сердалога» бир мехкарча спортацарча латарах йолча Федераце зарбан болх лелабераша.
«Магас» яхача спорта двореце хӏанз диъазлагӏа гуллуш ба 18 шерга кхачанза бола латархой, шоай говзал дӏахьокха. 11 тайпарча дозалах шоай низ дӏахьокхаш хилар Селий, Гӏаьбартой-Балкхарой, Нохчий мехкашкара, Оренбургски областера, иштта вай мехкара 140 спортсмен», - йоах тхога бенача хоамо.
Яхь хьаеллача дакъа лоацаш вар вай мехкарча паччахьалкхен кулгалхочун хьалхара гӏонча Йовлой Мухьмад, Россе спорта цӏихеза говзанча Махов Билал, лоӏамерча латарах йолча Европа чемпионата шозза чемпион, дунен чемпион, Россе спорте цӏихеза говзанча Гадисов Абдусалам, NFL лига Президент, вай мехкарча Халкъа Гуллама депутат Келаматанаькъан Гилани, иштта кхыбола цӏихеза нах.
Лакхерча лагӏа тӏа баьлар Дарсиганаькъан Мухьмад-Амин (42 кг), Оалмазанаькъан Ахьмад (45 кг), Лаьнанаькъан ӏаьла (48 кг), Поаланкой ӏалихан (51 кг), Боранаькъан Мухьмад-Амин (55 кг), Курамагомедов Мухьмад (71 кг), Эльмисов Кантемир (80 кг), Гаджикурбанов Курбан (92 кг), Овшанаькъан Мухьмад (110 кг). Гӏалгӏайчен тоабо 7 дошо майдилг яьккхар цига.
«Яхь укх шера диъазлагӏа дӏахьош яр вай мехка. Мехкашкарча лоӏамеча латарах йолча ишкола, иштта вайцигарча турнира берригача доакъашхошта лоархӏаме дар из», - белгалдир спорта хьалха латтача Белхарой Руслана.
