Къонача дезалашцара фусамий гӏулакхех йола семинар хилар Наьсарен кхален администраце
РФ бахаш болча наха паргӏата цӏенош ӏалашдарах йолча паччахьалкхен программанна юкъебахача къонача дезалашца семинар дӏахьош хилар укх деношка Наьсарен кхален администраце. Паччахьалкхено къонача дезалашта фусамашца деча новкъосталах дувцаш бар цига гулбеннараш. «Программан доакъашхошта де дезар хьалхадоаккхаш, иштта цар хаттараш доашхаш болх бар дӏабихьар.
Лертӏа, паргӏата дола цӏенош эша къона дезалаш дӏаязбарца дувзаденнараш белгалдир кхетаче. Къаьстта терко йир цу гӏулакхаца эшача каьхаташта, беррига болх боаггӏача боараме, ше-ший аргӏагӏа дӏабахьара.
Программан юкъе бола нах 35 шерал дукхагӏа даьнна хила йиш яц, цудухьа цу ханага кхачале тохабала беза цар шоай гӏулакхага хьажа»,- йоах «Сердалога» Наьсарен кхален администрацера бенача хоамо. Хьакимашта хьалхашка латтача керттерча декхарех да къонача дезалашта фусамаш хилийтар, цар оагӏув хьаллацар. Цӏа эца е шоай доазон тӏа хьалде паччахьалкхенгара субсиди эцара, из дӏа-хьа хьожадара балхах дийцар доакъашхошка кхетачен хьалхалаттараша.
