Яндаре дегӏайоалаяра наькъаш дийцар Наьсарен кхале
Яндаре хилар Наьсарен кхален администраце кулгалхочун декхараш кхоачашдеш вола Овшанаькъан Мухарбик, цун гӏонча Исмейланаькъан Темарлан, административни комиссе доакъашхо Тӏоаршхой Мухьмад. Юртарча урамий хьал мишта латт тохкаш хилар уж тахан. Моттигерча хьакимашца цар дийцар эггара хьалхарча оагӏонца кхоачашде дезарех.
«Къаьстта терко йир комиссе моттигий санитарни хьала, ЖКХ оагӏонцарча балха, иштта урамашка лампаш йоахкий хьежар. Тикашта хьалхашкарча моттигий куц тоаде дезилга белгалдир цар, цул совгӏа дукхача гӏатех латтача цӏеной хьалах, царцарча гӏулакхех дийцар. Яндаре спорта лаьрхӏа моттигаш хила езилга теркалдир хьакимаша. Администраце болхлоша яхачох, цу оагӏонцара гӏулакхаш тоадара тӏехьа къахьегаш ба. Юртарча берашта, кагирхошта хӏара денна спортаца бувзам лоаттабе къаьстта тоадаь доазув хила деза», - йоах «Сердалога» Наьсарен кхален администрацера кхаьчача хоамо.
Яндарерча администраце къахьегамхошца керттерча гӏулакхех, касташха кхоачашде дезарех дийцар комиссе. Юртарча урамашка лостам хилар, наькъий хьал тоадар, сийрда лампаш йохкар бахархой хьал аттача доаккхаш да.
