Гӏажарий-Юртарча культуран Цӏагӏа Келаматанаькъан ӏалихан дагалаьцар
Лоархӏаме кхетаче дӏахьош хилар Гӏажарий-Юртарча культуран Цӏагӏара болхлой, библиотекаца цхьана. Россе турпала, деналах, майралах визза къонах волаш къаман, Даьхен гӏулакха лаьттача Келаматанаькъан ӏалихана хетаяь яр из кхетаче.
«Библиотека кулгал деча Исаевгӏар Альбикас къамаьл деш дӏадоладир вӏашагӏкхетар. Хамхой Джамалейлас къаман сийдолча воӏах язъяь очерк керте лоацаш, къамаьл дир цо. Келаматанаькъан ӏалихана вахара, къахьегама никъ малагӏча гӏулакхашца бувзабенна хиннаб дийцар цига. Россе исторе дошоча ганзе чӏоагӏъяь латт вай деналах визза хиннача мехкахочун цӏи», - дийцар «Сердалога» цу моттигера.
Культуран Цӏен солистка йолча Эльгакаевгӏар Седас дог тохадолийташ дола «Тхона тохаш бале а, тхо гӏетташ да» яха илли дӏааьлар цига. Къаман юкъе, ерригача Россе цӏихеза волаш ваьхача цу сагах ала, дагадоха дукха дар.
Келаматанаькъан ӏалиханах лаьца документальни кино гойтар цига. Белгалде деза, иштта болча къонгий цӏераш исторе бӏаьшерашка яхаргйолга, иштта деналах бизза хиннача мехкахоша даьр дицлургдоацилга. Келаматанаькъан ӏалиханах ала дукха да тахан мехкахой. Ший къамах, Даьхенах дог лазаш ваьха саг ва из.
