Кердача Реданте дӏайихьар, Янданаькъан Жамалдий 110 шу дизара хетаяь кхетаче
Кердача Реданта культуран Цӏагӏа, «Даькъастен поэзе классиках бола дагалоаттам» яха кхетаче хилар. Из вӏашагӏкхетар хетадаь дар, гӏалгӏай къаман поэт Янданаькъан Жамалда ваь 110 шу дизара.
«Цун керттера маӏан дар кхувш йоагӏача тӏехьенна къаман литературан ганз йовзийтар, хьамсарча гӏалгӏай метта хозал гойтар. Кхетаче дӏахьош дийцар поэта литературан начӏалах. Цо шийна тӏехьа 20 гӏалгӏай а эрсий а меттала книжкаш дита хиларах.
Хургволча классика керттерча вахара наькъа дикка ӏаткъаш хиннай цун даь-нана. Ше зӏамига бер долча хана, цо шийна дувцаш хиннар, иштта халкъа хьаькъал ларде лаьцад цо», - аьлар «Сердало» газетага культуран-салоӏама урхаллен кулгалхочо Хоаной Марета.
Кхетачен доакъашхошта дийцар Янданаькъан Жамалда чоалханеча вахара наькъах. Из йоазош де волавеннав 1936 шера, Гӏалгӏайчен поэзе мугӏараш кхолла болабеннача хьалхарчарех цаӏ хиннав из. Къам мехкахдаьккхача эггара халагӏча 1944 шера а, автора ший къоалам соцабеш хиннабац, исбахьален таржамаш деш. Из бахьан долаш, гӏалгӏай меттала даьхар Пушкин Александра, Лермонтов Михаила, Горький Максима, Маяковский Владимира толашагӏа дола йоазош.
Тахан говзанча тӏехьале ишкола программанна юкъейоагӏаш я, из дешархой дагахьа латтаргья, цо иштта таро лургья гӏалгӏай мотт шаьрбе.
