Укх шера болх дӏахьош, нах дукхагӏа тӏалатта 24 моттиг тоаергья вай мехка
Шахьара моттигаш тоаярах йолча федеральни проекто, вахарера гӏулакхаш меттадоаладарах йолча къаман проектага гӏолла болх дӏахьош, 24 моттиг тоае лерхӏ вай мехка укх шера. Ийс муниципальни моттиг чулоацаш болх хургба цох. 145, 584 млн сом ахча да цу гӏулакха хьакъоастадаьр.
Эггара хьалхарча оагӏонца тоае еза моттигаш къоастаяра тӏехьа онлайн-хоржамаш дӏадихьа, хьахержа я уж 24 моттиг. Мехкарча шахьарий, юртий куц тоадеш бола лоархӏаме болх ба из. «Хӏама тоадара гӏулакх духхьала хоза хиларах латташ дац. Эггара керттердар да цу моттиге нах тӏалаттар, бахархой шоай дезалашца арабувлаш цига салаӏа, ха дӏаяхьа ахар. Россе Президента Путин Владимира йоаржаяйтача къаман проекташка гӏолла, моттигаш йовзаргйоацача тайпара тоае, меттайоалае аьттув ба вай. Хӏаьта эггара керттердар да; хьадеш дола гӏулакх боаггӏача боараме, тӏехдика чакхдаккхар.
«Цаӏ йолча Россе» къаман программо доккха гӏо ду из иштта хургдолаш, бахархошта дезар теркаме лоацаш. Тахан вайна лоархӏаме да, моттиг тоаяь яьлча, тхона паргӏато хургйолаш, тха хьашташ кхоачашдара тӏехьа хьадаь да-кх ер деррига, аьнна, бахархошта хеташ хилар», - аьлар вай мехкадас Келаматанаькъан Махьмуд-ӏаьлас.
Хӏама дика хилар дӏадахача ахчан боарамца дусташ дац; дуккхача шерашка бахархой цига салаӏа, саготалла арабаьнна ха дӏахьош хила безам хиларца теркалдеш да. Хӏара моттигера хьал теркаме лоацаш, деррига боаггӏача боараме хилийта гӏерташ дӏабахьа безаш болх ба из тахан.
