ГӏалгӀайчен Парламенте дийцар, «Кавказ» Р-217 наькъа даькъ тӀарча кхерамзленах
Халкъа Гулламе дийцар «Кавказ» Р-217 наькъ тӀа, Эккажкъонгий-Юрта йистте нийслуш долча наькъа хьовзамех, яхаш, хоам бу «Сердало» газетага республикан Парламенто.
Паччахьалкхен гӏишлонех, закон хьакхолларах йолча комитета кхетаче дӀахьош, депутаташа техкар, федеральни наькъ тӀа, Эккажкъонгий-Юрта йистерча, МутаӀаланаькъан урамах нийслуш дола хатараш.
«Кхетаче дӀайихьар Гаданаькъан Ислама кулгал деш, ГӏалгӀай Республикан Кулгалхочунца дагавоалача Гаьгенаькъан Руслана, ГӏалгӀай Республикан промышленноста, таьрахьашца дегӀаахара кулгалхочун декхараш кхоачашдеш волча Угарчанаькъан Ислама, «Кавказ» Упрдор ФКУ Наьсарен-Шахьара викалий кулгалхочун декхараш кхоачашдеш волча Балханаькъан Ахьмад-Хана, Халкъа Гуллама депутаташа дакъа лоацаш», - аьлар хоамо.
Депутаташ нах тӀаэцаш болча хана, бахархоша дукхаза дехар дир цу наькъ тӀа нийслуш долча хаттарашта терко яр, зуламаш кӀезигагӀа нийслургдолаш цу унзарча даькъ тӀа.
Гулбеннараша белгалдир, цу федеральни наькъ тӀа дукха машинаш хул; цул совгӀа, никъ а халагӀчарех ба.
Парламенто яхачох, цу гӀулакха бехке йола моттиг кхерамзле хургйола хьалаш долаш яц.
Наькъа технически хьал дувцаш, Угурчанаькъан Ислама хоам бир, сурта гӀирсаш кхоачам боацаш хиларах - видео гӀолла наькъа хьал довзара йола таронаш эсала я, цудухьа наькъа бокъонаш телхаераш а совбоалаш боагӀа, цу гӀулакха материально-технически база хила еза.
Ший аргӀагӏа, Балханаькъан Ахьмад-Хана белгалдир, «Кавказ» Р-217 федеральни машиний никъ, «Кавказ» Упрдор ФКУ тӏалатташ хиларах, из доалахо а, доал деш йола моттиг а я, аьнна. Цо бовзийтар тахан цу даькъ тӀара хьал аттача даккхара беш бола болх.
Депутаташа аьлар, цу даькъ тӀа хьалхарча аргӀагӏа эшар кхоачашде дезарах.
Комитета протокола тӀа чӀоагӀдир цу гӀулакха эшаш дола хьалаш ӏалашдара, ГӏалгӀай Республикан промышленноста, таьрахьашца дегӀаахара Министерствога кхайкарал дир, царгара эшаш дола новкъостал дехаш, сурта-видео эцара.
Цул совгӀа, дийцар хьалхарча аргӀагӏа де дезар. Цу юкъедоагӀаш дар хӀанз йолаш йола, Эккажкъонгий-Юрта йистера «Кавказ» Р-217 наькъа даькъ тӀа нийслуш дола хьал автоматически хьалоацаш лелаеш йола комплекс дехьаяккхар.
Республикан Парламенто цох де лерхӀар дӀадохьийтаргда цунна чудоагӀача федеральни, республикански Ӏаьдала болхлошка, из лоархӀаме хаттар тӀахьожам болаш да.
