Куран тӏарча «Къонача эскара» кхетаченга кийчо ярах дийцар мехкарча Паччахьалкхене
Ерригача Россе берий-кагирхой болама «Къонача эскара» 10 шу дизара хетаяь йолча кхетачен балхах дийцар вай мехка. Цу кхетаченна кулгал деш вар премьер-министр вола Сластенин Владимир. Иштта цига дакъа лоацаш хилар тайп-тайпарча министерствошкара кулгалхой, цу болама моттигерча оагӏонна хьалхалаттараш. Кхетаченга кийчо ярах йола докладаш йийшар цига СКФО «Къонача эскара» куратора Бохтаранаькъан Мадинас, республикан штаба кулгалхочо Муружанаькъан Мухьмада.
«Массайолча моттигаша, цхьана болх дӏахьош, кийчо е езаш гӏулакх да из. Программа боаггӏача боараме кийчъяь хила еза, вай республика дӏайовзийташ бола болх тӏехдика тоабаь. Мехкашта юкъера бувзам чӏоагӏбеш, Къилбаседа Кавказе цу болама гӏулакх дикка тоадеш, болх хургба аьнна хет сона цох», - аьлар Сластенина.
Кхетачен вӏашагӏкхетараш дӏахьош къахьегарах, деррига а цхьаккха кхоачамбоацар доацаш тӏехдика нийсдаь, тоадаь хилийтарах дийцар гулбеннараша. Къонабарашта лаьрхӏа гӏалгӏай къаман истори, ӏадаташ, культура йовзийташ йола программа кийчъяра къаьстта терко йир цига. Укх бетта 25-ча денгара 27-ча денга кхаччалца, хургья «Къонача эскара» мехка кхетаче. Къилбаседа Кавказа моттигашкара 120 къона эскархо тӏаэцаргва республико, вай мехкара 50 викал юкъе волаш.
