Дола-Коа дӏайихьар, «Истори дувцаш йола гӏалаш» яха кхетаче
Дола-Коарча культуран Цӏагӏа дӏайихьар «Истори дувцаш йола гӏалаш» яха кхетаче, из хетаяь яр гӏалгӏай Гӏалай Денна. «Дешархошта культурах лаьца» яхача дешара проекта чуйоагӏаш, из кхетаче лаьрхӏа яр исторически дагалоаттам лорабара, иштта гӏалгӏай къаман тамашийна тӏехьале йоаржаяра.
«Кхетаче дӏахьош йолча Бохтаранаькъан Иманайца цхьана, къонача доакъашхоша дӏаяхача ханашкара экскурси йир, царна дайзар гӏалай архитектуран лоархӏамедараш, къаьнарча гӏишлоний керттердараш, иштта царна хьалхадаьккхар вахара, тӏема гӏишлош сенна езаш хиннай.
Къаьстта дийцар гӏалай белгалонаш малагӏаш я. Гӏалгӏашта уж хиннай тӏабоагӏача моастагӏчун бӏуна духьалъоттара хинна а ца ӏеш, боккъонца йола тайпан сий лорадеш йола гӏишлош», - аьлар «Сердало» газетага Дола-Коарча культуран Цӏен кулгалхочо Алерой Билала.
Эггара керттера моттиг хилар къаьнара - Цӏечо, Маьлхе яхача шин кӏаьнках бола халкъа оалам бовзийташ яр. Моастагӏа тӏавеначул тӏехьагӏа, кӏалхарбала таро хиннача цар шоай даьйх дагалоаттам лорабаьб, цул тӏехьагӏа гӏалгӏай доккхача шин тайпан даьй а хилар царех. Из истори дезаделар цига мел хиннарашта.
Исторически экскурси дӏахьош, «Денала белгало - Гӏалгӏай гӏала» тематически книжкай гойтам бар культура Цӏен библиотеке боаржабаь. Цига гуш дар наггахьа мара гуш доаца архивни сурташ; Кавказах йола исторически ӏилман материалаш, иштта Гӏалгӏайчен тамашийнача ӏалама, культуран тӏехьален оагӏонаш ювцаш дола книжкаш.
Кхетачене берашта таро елар кӏоаргагӏа йовза халкъа культура, цун сий, иштта ӏадаташ лорадар лоархӏаме долга кхетаде.
