Дола-Коа кхетаче хилар, Юхерча Малхбоалера баьхкача нахаца
Дола-Коа хьехама кхетаче дӏайихьар, Юхерча Малхбоалера баьхкача нахаца. Из хилар №7 йолча моттигерча юкъарча дешара даькъ тӏа.
«Цига къамаьл деш, дакъа лоацаш бар кхален ӏаьдала викалаш, иштта Магӏалбика кхален администраце кулгалхочун заместитель Иленаькъан Зейнап, кхувш боагӏарий гӏулакхех йолча комиссе секретарь Боканаькъан Хьава, гӏо деча даькъа кулгалхо Малорой Залина, ОПДН инспектор Доданаькъан Марем», - аьлар «Сердало» газетага Магӏалбика кхален администраце зарбан болх лелабераша.
Керттера дийца дош дар кердача моттигерча бахара хьалашка дӏаӏамар, нахаца юкъа хилар, цар социальни бувзам меттаоттабар. Эксперташа къамаьл дир берашца, законаш лорадарах лаьца, юкъарлон боарамаш довзийтар, шоаш даьча хӏамах бехктокхаме хилар хьалхадаьккхар. Цу тайпара кхетаченаш дӏахьош хилар - хьабаьхкача наха юкъарча вахарга бала аттагӏа хургдолаш, бераш массайолча оагӏорахьа лерттӏа дегӏаахара эшаш я.
