Дола-Коарча культуран Цӏагӏа хилар, «СВО турпалхой вайна юхе бах» яха кхетаче
Дола-Коарча культуран Цӏагӏа «СВО турпалхой вайна юхе бах» яха кхетаче дӏайихьар. Кхетаче хетаяь яр Даьхен бӏухошта - лаьрххӏача тӏема операце доакъашхошта, из лаьрхӏа яр кхувш йоагӏача тӏехьенна тӏема-патриотически кхетам балара.
«Дешархошта хьалхашка къамаьл дир кхетаче дӏахьош хиннача Алерой Шамхана. Ше кхайкарал деш, цо белгалдир вай бӏухой даим хиннаб майрал, денал долаш хиларца шоай цӏи хозийташ. Кхетаче дӏахьош хинначо иштта хьалхадаьккхар, тахан а вай бӏухой СВО даькъ тӏа денал долаш, Даьхе лораеш, моастагӏчоа духьаллатташ хилар. Берашта гойтар, царна из хьал дикагӏа довзаргдолаш, «Мишта дӏайолаелар СВО» яха документальни фильм»,- аьлар «Сердало» газетага Дола-Коарча культуран Цӏагӏа.
Цу дийнахьа берашта лаьрхӏа «СВО турпалхошта карагӏдаьннар» яха библиотека гойтам а кийчбаьбар, цига дувцар лаьрххӏа йола операци дӏахьош тӏема мугӏарашка латтача вай мехкахоех. Материалашта юкъе дар Дола-Коарча кагийча нахах дола дувцараш а, цар тӏема гӏулакхаш а, цига цар гойта денал а белгалдераш.
Денал, майрал хилар, Даьхе езар - уж да Россе визза саг ше хилар гойташ дола масалаш. Гӏалгӏайчен кхувш йоагӏача тӏехьенна гуш дола СВО мехкахой-турпалхой денал цар доккхал де йиш йолаш да.
